الجمعة، 26 ديسمبر 2008

مخطووبة


لك مني...


البارحة كانت خطبة ريفيجتي


(الله يوفقها و يبارك لها و يسعدها)


كانت فرحانة و خايفة و مستحية مرتبكة ماتدري شتسوي


بس الحمد الله على قولتها


عدت الليلة على خير




_____




القصة


دخلت امي داري و سكرت الباب وراها قلبي نقز ,أمي ماتسكر الباب الا اذا في شي جايد بقلبي كنت اقول الله يستر..
الوالدة تيي تقعد و تحط يدة على جتفي: حبيبتي


اطالعها و بكل استغراب: خير يما


ترد عليي وبكل حنية: في ناس نعرفهم داقين عليي يبون ايوون يعني يتعرفون علينا


انا و جني بديت افهم امي شنو تبي توصل له: اي ويعني ؟؟ خل ايوون عادي .. حياهم الله


أمي و بتوضيح: اي مو اهمه يايين عشانج


انا بأستهبال: شلون؟؟


الوالدة بجدية: انتي عارفة و فاهمة


انا: يما بس انتي تدرين اني انا ما افكر الحين بالأرتباط اكمل دراسة..


امي تقاطعني: انتي فكري و اهمه بعدين يايين بس يتعرفون علينا مو خطبة يعني وبعدين اهمة خوش ناس وانتي تعرفين بنتاتهم


انا الي كلش ما اهتميت و فريت ويهي الصوب الثاني و قعدت اقلب بصفحات الكتاب


امي الي طلعت من بعد ما باست راسي


في اليوم الثاني من الصبح عالريوق: صباح الخير يما وأروح ابوسها


الوالدة: نورة شقلتي حبيبتي


انا: بشنو


الوالدة: الناس حبيبتي


وتدخل اختي الصغيرة عالخط: اي ناس؟؟


اختي الكبير و تغمز لها: الخطاااااااطيب


اختي الصغيرة: صج نواره مبرووووك


انا الي عصبت من كلامهم و قلت حق أمي يصير خير عن السالفة و طلعت, طول الطريج و انا افكر منو هذول ؟؟.. و ارد على روحي بروحي: انا حتى ما عطيت امي مجال تقول لي منو اهمه.. بس اهله قالوا ان يبون يتعرفون يعي اهمه مو شايفيني..


وصلت الجامعة و حضرت محاضرة و المحاضرة الثانية تعذر الدكتور عنها قلت خل اروح اتمشى شوي..


رحت محل عطور و بخور شريت لي جم شغلهة و طلعت بعدها رحت الجمعية خذيت لي عصاير و كورنفلكس لايت ( حق الرجيم الي مادري متى بسويه) حاسبت و طلعت بالسيارة قعدت اطالع الأغراض و اقول اول مرة اروح الجمعية بروحي.. الظاهر اني لازم اتعود من الحين


وبسرعة غيرت تفكيري و رديت حق تساؤلاتي.. اهوه ما شافني اهله اهمه الي يبون يتعرفون علينا و يشوفوني.. انا ما ابي اخذ واحد ما شافني


وصلت البيت أمي كانت قاعدة بالصالة: قوة يما


الوالدة: هلا يا نور عيوني يالعروس انتي


انا: ترا بهون


امي اطالعني بفرح خلتني انتبه حق عمري شنو ترا بهون انا وافقت عشان اهون وبسرعة قطيت كلمة وهقت روحي اكثر: انا موافقه ايوون انشوفهم و نتعرف عليهم بس مو خطبة


الوالدة: هذا الي اهمه يبونه


شلت اغراضي و رحت داري بدلت و صليت و نزلت المطبخ و لا ابوي داخل وراي المطبخ


الوالد: هلا بالعروس هلا بالزين عيل وافقتي؟؟


انا الي مت من الحيا و نزلت راسي بالأرض


الوالد: ترا الريال خوش ريال و الكل يمدح فية


انا: يبا انا وافقت اشوفهم و نتعرف عليهم بس مو خطبة وبعدين اذا اهوه ما شافني انا ما ابيه


الوالد: تطمني مو قال لج ما شافج؟؟ وبعدين تأكدي انا ما اوافق بنتي تاخذ واحد حتى ما شافها بس جذي اهله قالوا له عنها و يلا و السلام.. يانيتي ترا احنا محنا عيزانين عنج.. اذا ماتبينه مو لازم .. لكنة خوش ولد


انا الي استحيت من كلام ابوي: انشاء الله خير


بعد يومين العصر امي نادتني و رحت لها: نواره يما الجماعة دقوا عليي يبون يزورونا متى يناسبج؟؟

انا : خليها ليلة الجمعة يكون احسن وراها اجازة

الوالدة: خلاص ان شاء الله انا اكلم امه بعدين و اتفق معاها

انا : على خير ان شاء الله
اليوم الثاني بنفس الوقت كنت طالعة و رديت ولا أمي تتكلم بالتلفون تكلم يدتي رحت و قعدت يمها أمي سكرت التلفون: يدتج تسلم عليج
انا: الله يسلمها
الوالدة: انا قلت حق خالاتج و يدتج
انا: يماااا ليش؟؟
الوالدة: شنو الي ليش اهلج هذول مو غرب وبعدين زهبي روحج حجزت لج بالصالون باجر واليوم روحي اشتري لج بدلة حلوة وعقبة بنروح نختار الأكل حق باجر
انا الي مليت من حنة امي و تجهيراتها: الي يقول السالفة صج وبعدين هدوم ماني شارية ملابسي شحلاتهم و رحت فوق معصبة من سوالف امي
عالساعه 7 جذي كانت امي لابسه و جاهزة يايه لي الدار: يلا قومي خل نروح السوق
انا: يما مالي خلق وبعدين ليش السوق بدلاتي حلوين و مولابستهم شي البس اي وحده
الوالدة: انزين خلاص قومي نتمشى نغير جو و ونختار الأكل
اناالي استسلمت حق حنة امي: خلاص خلاص دقايق وياية وراج
عقب ما خلصنا من ((وليمة)) باجر امي قالت خل نروح نتمشى شوي, و شوي شوي امي فتحت السالفة: باجر ان شاء الله اذا يو ولدهم يوسف يبي يشوفج
انا بقلبي: حلاتة بو احمد
انا: مو تقولون انه شايفني
الوالدة: اي شايفج من بعيد اهوه يبي يكلمج
انا: صارت خطبة اشوف.. يصير خير
امي ما حبت تضغط عليي كانت تبي تكلمني عنه بس عالخفيف بعدها خذينا اغراضنا و ردينا البيت عشان نرقد استعدادا حق باجر







يتبع



هناك 12 تعليقًا:

kAiKa-MGroMa يقول...

عالبرررركه الله يوفقها يارب

والقصه صجيه ولا تأليف ولا مكس من

الواقع والخيال

p:
.

TruTh يقول...

الف مبروك حبوبة و ناطرة تكملة الموضوع و ان شاء الله تكون الأحداث الياية كلها سعيدة و ربي يتمم لج بألف خير

:)

bhr.qadsaweya يقول...

كيكة
ويوفقج يا رب
لا حبيبتي القصة مو صجية
خيال بخيال P:
يعطيج العافية و منورة

_____

تروث
يبارك فيج عزيزتي
انشاء الله D:
بس ترا هاذي قصة مو انا
انشاء الله انتي عأبال عندج اذا ماكنتي متزوجة ;)
و منورة بمرورج
يعطييج العافية

كبرياء وردة يقول...

مبرووووك
الفال لج الغالية
ناطرين التكملة

bhr.qadsaweya يقول...
أزال المؤلف هذا التعليق.
bhr.qadsaweya يقول...

كبرياء وردة

تسلمين و الله يبارك فيج
وانشاء الله لج بعد حبيبتي
يعطيج العافية D:

Om MoD يقول...

يعلج العافية وأنا صدقت ...

ما عليه القصة حلوة ...والفال لج حبيبتي :)

bhr.qadsaweya يقول...

OM MOD
هههههههه حلاتج و الله
يعني لو ما قلت ان هاي قصة جان مشت عليج السالفة :))
ان شاء الله حبيبتي
يعطيج العافية

Om MoD يقول...

إي والله صدقت كلش كلش ما خطر ابالي انها قصة ..بعدين قلت مو معقوله قايله لج كل هالتفاصيل يمكن هذي قصة خطبتج ...لووووووووووول

bhr.qadsaweya يقول...

OM MOD
ههههههه
ايااا عليج و الله من طيب قلبج لأن
لااااا افا انخطب وما اقول لج
اذا صار و انخطبت انتي اول وحده بتعرفين ;)
يعطيج العافية

غير معرف يقول...

can u leave ur phone number to me???

bhr.qadsaweya يقول...

jordan shoes
i cant cuz i dunno who r u yet
but if u want to talk to me in something importanat u can take my email address and told me what ever u want..
thank u =D