الأحد، 21 يونيو، 2015

مبارك عليكم الشهر

لك مني...

مريت.. ولقيت للحين في ناس قاعدة تدخل البلوق لغاية اليوم
استانست بس هم بنفس الوقت ضاق خلقي.. البلوق هذا كان بأحلى ايام حياتي
أيام جميلة حلوة نظيفة!! شلون نظيفة  يعني بزمن كانت اغلب الأشياء ممنوعة أو خنقول ما كان كل شي متوفر
يعني عكس الحين كل شي بيدنا نبي نطلع نروح مجمع سينما نسافر بأي وقت.. لما توفر الشي زهقنا و ملينه.. تدرون مرات احس ان ليت للحين امي و ابوي مايخلوني اطلع الا لما استأذن قبلها بخمس أيام ليت للحين أبوي يوصلني و يردني المكان اللي ابيه ليت يرد الزمن اللي ابوي يوديني فيه المستشفى وقبل ما ننزل من السيارة يجفس "يطوي" لي الكلينكس.. مو عشان شي بس عشان فقدت الأيام الحلوة البسيطة فقدت حب أهلي وخوفهم عليي لما كنت صغيرة و يمكن فقدت نفسي!!
مرات اشتاق لقعدات البيت اشتاق اقعد بفراشي و اقلب بالمحطات بالتلفزيون اشتاق لنجرتي مع اخواني عالكبيوتر الكبير بو دبه الأبيض اذكر كنا بالدور نقعد عليه.. سبحان الله الحين كل شي متوفر بس مافي وناسة مافي متعة بالشي..

رمضان هالسنة غير كنت انتظره بشوق
واستانست لما يه حيل جنه فرحتنا قبل بيوم الأربعاء و يمكن اكثر
الحياة ماتغيرت الروتين تغير ونفوس البشر تغيرت
اذكر قبل كنا ننطر أبوي عند المدرسة انا و خواتي اهو ايي ياخذنا كل يوم يودينا المدرسة الصبح و ايي ياخذنا الظهر و اندق عليه
لما يتأخر من المشرفة.. شكثر كانت حلوة النطرة و الأيام.
الحين اصغر خواتي تخرجت و باجي بس الجعدة تخرج من عدادي بمعدل ما شاء الله 94 والسنة الجاية ثنوي ربي يوفقه و بعدها يدرس بره مثل حسين أخوي.. على طاري حسين أخوي تاريخ 1-7 برد البحرين توه خلص اول سنة من بره متخصص هندسة :)

ربي يوفقهم كلهم و يوفقكم و ربي يعطينا أيام حلوة تفرح قلوبنا
ربي اغفر لي ذنوبي ذنوبي كبيرة ربي اغفرها لي بأيامك الفضيلة

مبارك عليك الشهر واذكروني بدعوة