الأربعاء، 24 سبتمبر، 2008

آخر بوست :(

هذا البوست راح يكون آخر بوست لي

راح اكتفي بالتعليق بمدوناتكم

كانت فرصة حلوة تعرفت فيها عليكم:

om mod oo kel fyonkat

مشكورين على تواصلكم و تشجيعكم الدايم لي
om mod

الله يخلي لج عيالج ويحفظهم لج

وانتي خير أم لهم :)

.

Gawga3a

مرورج نور بلوقي

واسعدني وايد

حسيتج فاهمتني في وايد اشياء

وفيني منج في وايد اشياء

والله يوفقج..

.
Kuwait master
مدونتك حلوة
وافكارك حلوة
شد حيلك و خلص الثنوية :)
.
3bady
انت صاحب القلم الذهبي
كتاباتك مميزة<< لك مستقبل p:
والله يوفقك بحياتك الجامعية
.
Smarties
مرورك اضاف بريق على مدونتي
تشكر على هالبريق والتشجيع
:)
.
waleedo (bahraini)
ana 5letk tsawe lek blog oo ana
el7een ba6l3 mn 3alm eltadween
sry
.
The boss
مشجع بني قادس العزيز
حسيت فيك روح المثالية
وان شاء الله تكون مثالي :)
وعطني ولعة :)
.
غريب
قصصك ورواياتك واقعية و عجيبة فيها من الحياة
تكتب بكل حب و صدق
واصل و بلوقك دووووم منور و حافل يارب
.
بانوراما (الموالي)
مرورك خفيف عالمدونة وعلى القلب
ان شاء الله تكون استمتعت بمدونتي
وشد الهمه هاذي اخر سنة
.
banbang2
اممم فيج روح المرح
وان شاء الله دووم تكونين هاللون
انا زرت مدونتج لما كنتي مسافرة وحطيت لج كومنت
بس يمكن ماشفتيهم
وقول لج مدونتج من اروع المدونات
:)
.
.
.
الله يوفقكم
وشكرا لكل من تواصل معاي
تشرفت ابمعرفتكم واااايد
اووووو يعطيكم العافية
________
في انتظارك (3)
فارقت العين عني شلون؟؟
انا ما حضنتك قبل ماتروح
ابجي بحضنك انا اليوم
جسد بلى روح اشلون؟؟
عيني من الدمع بتموت
اترجاك عني لاتروح
اعيش من دونك شلون؟؟
بيتي بعيد عن بيتك
بالتراب انت بيدفنونك
حرام توك شباب عمرك يروح
انحرم من شوفتك دهور
ريحتك و ملامح وجهك
كل هذا عني بروح
ومن عقبك انا محروم


الخميس، 18 سبتمبر، 2008

في انتظارك 2

لك مني...

هيااا هيااا القادسية

اهداء لكل من حيا الأصفر و قال القادسية

3-2 شنبي بعد

الحمدالله و الف شكر لك يارب

الملكي و بس

الله معاك يالأصفر


________



يمر اليوم الأول وفيه زينب تموت روحها

ماتعرف شتسوي من غيره كان املي عليها حياتها عمرها ماحست بالفراغ ولا بالوحشه معاه وينتهي اليوم من دون ماتمسع صوته اول مره من زواجهم ترقد من غير ماتتمنى له صباح حلو من غير ماتبوس راسه و تسأله راضي عنها و لا لا ...

الحياة من دونك ضياااع مالها مفر

والحياة معاك احلى ضياع

وايي اليوم الثاني .. كل شوي اطالع التلفون مو عارفة تقعد

معقوله ما يدق ولا طرش مسج , تقوم تاخذ شور و تروح الدوام تحاول تهرب من تفكيرها فيه .. لكن هيهات ماقدرت تكمل الدوام تستأذن انها بتطلع وتطلع تروح البيت و تلفونها ما يفارجها ادق عليه مغلق تاخذ سويج السيارة تطلع تبي تلهي روحها بأي شي المحاتات ذابحتها تفتر بالشوارع كل شي غريب عليها ماتدري وين تروح , تسوق لكن السيارة اهيه الي تسوقها وين ماتوديها الشوارع تروح شافت روحها يم البحر نزلت و قعدت عالسيارة تذكرت قبل زواجهم كان دوم اييبها هني تذكرت شلون شافته اول مره هم كان هني ماقدرت حست روحها تخنقها تبي تبجي فيها بجوة بس مخنوفة

ركبت سيارتها و حركت قالت بتروح بيت عمها ووصلت عند بيت عمها لكن ترددت اذا دخلت بتزيد محاتات خالتها على ولدها غيرت طريجها وراحت الجمعية شرت شي تبيه و شي ماتبيه حاسبت و طلعت وردت البيت غسلت و صلت راحت المطبخ تذكرت الأغراض الي شرتهم نستهم بالسيارة راحت بتييبهم فتحت الدبه شالت الجياس يات بتسكر الباب شافت جنطته مالت الحداق ودت الجياس البيت وحطتهم بالمطبخ ردت شالت جنطة الحداق ورجعت داخل البيت خذتها للصالة فتحتها وقامت اطلع عدة الحداق الميدار و الشبك وغيره وغيره... وشافت دفتر اسود طلعتها وفتحت اول صفحه..

اهداء

اهديك كلمات من قلبي

لك وحدك يا محبوبتي

فيها من احاسيسي و مشاعري

اخطها لك بين السطوري

تقبليها مني ولو من بعد حين

من لك يا جوريتي (زينب) ...

الصفحة الثانية

من هنا ابتدي صفحتي

من هنا يأخذني العشق لك

عرفت الهوى وليدا

كبرت ولم ازل تلميذا في حبك

لو طالت المسافة بيننا

شوقي لحضنك هو عودتي و مرجعي..

والثالثة .. و الرابعة الخامسة السادسه

لحد ماوصلت لنص الدفتر

اذن العصر قامت تيددت وصلت

خلصت صلاة و شالت السيادة

توها بتشيل ثوب الصلاة و لايرن التلفون

(مشتاق لك موت و الله يلي طول غيابك ذبحني الشوق ...)

زينب: الوووو

...: هلا هلا هلا بالجوري كله

زينب: حمد الله على السلامه

...: الله يسلمج يالغاليه شلونج شخبارج

زينب: انا بخير كل شي بخير انت شلونك

...: انا بخير دامج بخير

زينب: علامك مادقيت عليي البارحه و جهازك كل مغلق قعدت احاتيك

...: حبيبتي آسف و الله وصلت متأخر وكان عندكم ليل و قلت اكيد مسكره جهازج و لا شلون؟؟

زينب: اصلن البرحه ماسكرته و طول اليل مارقدت

يقطعها: افاا و انا الي قايل لج تحملي بروحج تبيني احاتيج و ما اخلص شغلي و اتأخر عليج

زينب: شسوي مو بيدي .. دقيت على خالتي؟؟

...: لا حبيبتي الحين ادق انتي ديري بالج على روحج انا بدق الحين على اختي بقول لها تيي ترقد معاج

زينب: لا يا قلبي انا قلت بقول حق اخوي ايي يرقد عندي بالبيت

...: احسن بعد سمعي باجر اجازة مو تقعدين بالبيت طلعي و اذا طلعتي مو اطولين انزين

زينب : ان شاء الله

...: حبيبتي انا بالليل ان شاء الله ادق عليج و اذا عدت 12 ومادقيت سكري جهازج ورقدي بس ان شاء الله ادق

زينب: ان شاء الله لا تحاتي شي يا قلبي بس الحين عفية دق على خالتي تلاقيها تحاتيك

...: ان شاء الله تحملي بروحج حبيبتي اوكي

زينب: ان شاء الله أحبك

...: أحبج

ويستكر الخط مع كلمة أحبج منه

شالت زينب ثوب الصلاة من عليها وشالت اغراض الحداق وردتهم بالجنطة خذت الدفتر و راحت عالسرير قعدت تقرا و تقرا اذن المغرب قامت صلت و ردت دقت على اخوها و قالت له ايي يرقد عندها وفعلا عقب جم ساعه يه عندها صلوا العشا و طلعوا تعشوا برا و ردوا البيت واهيه ردت لغرفتها و لدفتر حبيبها و زوجها خلص الدفتر و ما صارت الساعة 12 قامت و بدت تقرا من يد و يديد من اول صفحه ورن التلفون

(مشتاق لك موت و الله يلي طول غيابك ذبحني الشوق و انته عني مو داري..)

...: فديييتها الي تنطر

زينب: انا الي افداك

...: مارقدتي ها

زينب: وين ارقد و انت قايل لي بدق

...: يعني لو ما قلت لج بترقدين ها؟؟

زينب: اي بررقد

...: تقدرين ها ميخالف

زينب: ههه مليق

...: ومليق بعد لا لا زعلت

زينب: امزح معاك

...: ادري ياعمري اطفرج.. قولي لي اخوج يه البيت؟

زينب: اي حبيبي انت قول لي تعشيت

...: اي الحمد الله و انتي؟؟

زينب: عافية اي هم انا تعشيت

.... وظلوا يسولفون و يسولفون

وزينب قالت حق ريلها عن الدفترالي لقتها بجنطة الحداق

و هم اهوه قالها عن اللبلوزة الي خذاها من ملابسها و اهيه ماتدري

واستمرت المكالمه ساعات عقبها كل واحد فيهم تمنى حق الثاني صباح حلو و احلام سعيدة و رقدوا...











الاثنين، 15 سبتمبر، 2008

في انتظارك

لك مني...
ابجي على حافة السرير شعري مغطي ويهي
يدخل الغرفة و يقرب مني ايي يبي يبوس راسي
يلاقيني ابجي ينزل لعند ركبتي ويمسح دموعي: علامج يالغالية
اشيل يده و اشمها
...: لاتضيقين خلقج حبيبتي
ايي يقعد على السرير يمي يلمني ويمسح على راسي: تبين تزعليني يعني
ابتسم له و الدمعه بعيوني: تحمل بروحك فاهم
يضحك ويقول لي : ان شاء الله ام خشم
اطالعه و اقول له : شنو
يقلدني و يحاول يضحكني: شنووووو شنوووووو مليقة كل تسوي روحها تحبني
اعطيه نظرة و افر ويهي عنه
....: تحبيني ها ؟؟ تحبيني ام خشم
ابوسه على خده و اهمس له بأذنه: اعشقك
يغير نبرة صوته و يتحجى من خشمه: اعشـقك اعشـقك قوليه انتي بلول عدل
ابتسم له من كل قلبي, يحاول يضحكني واهو متضايق و زعلان يحاول يشيل الهم عني وهمه يلا قادر يشيله
يلمني ويبوس راسي: حياتي انا لازم اروووووح بس والله يا زينب والله والله احبج و بيي لج
يوقف و اوقف معاه: ميخالف عمري ميخالف بس انت تحمل بروحك و ديربالك اكل فاهم مو تيود الزقاير و خلاص
...: انتي ديري بالج على روحج
يمسك يدي و يبوسها ارفع يدي لشعره و المه: ان شاء الله
يقلدني : اشاء الله وين النون يا معوده كل يوعانه تبلعين الحروف
ابستم و اطالعه يطالعني و واذوب بعيونه: احبج
ويروح عني ويوعدني بعد سبوع بكون عندي
وانا في انتظارك يا حبيبي
.
.
.
عمري كله ما راح اشم عطر احلى من عطر نفسه
عمري كله ما بلاقي احد يحن عليي كثره
عمري كله فدوى لك يالغالي .. الله يوفقك ويسهل عليك

الأربعاء، 10 سبتمبر، 2008

تعب كلها الحياة

احس روحي تعبانة غريبة
بمكان انا عايشة فية
بدت دراستي وحدي متضايقة
احس بشي يخنقني مثل ياهل الي يتعذر عن المدرسة بألم ابطنه
متى تخلص السنة و اتخرج...
أعز و اغلى انسان بحياتي
عندي شعور اني قاعده افقده
قاعد يبتعد عني وكل يوم بعاده يزيد
الظروف اهيه الي تسوي جذي و لا احنا الي نخلق هالظروف
الله كريم
هالأشياء وايد متعبتني وضايقة عليي بدنيتي
رغم هالكون الوسيع
.
.
ياكريم اعفوا عني و اغفر لي ذنوبي
ارحمني بالدنيا و الأخره
يالله يالله يالله
_ _ _ _ _ _
الليلة عيد ميلاد خالتي
حبيت اقول لها كل عام و انتي بخير يالغالية و عأبال 1000 سنة يارب
الله يخليج لعيالج و يخلي لج عيالج
^
^
(خالتي انسانه شرحه حبوبه و قلبها ابيض تريح من يكلمها بكلامها..)
^
ما كان ودي اقولها لج يالغالية و انا متضايقة بس هذا الي صار
('?')

الاثنين، 8 سبتمبر، 2008

القادسية X الكويت

البارحة كانت مبارة القادسية و الكويت


و النتيجة كانت 3-1 لصالح القادسية


(هيا هيا القادسية)


اول قول كان بالدقيقة 26


حسافة كانوا بييبون قول رابع بس طلعت الكرة بره الملعب


يعطيهم العافية اللعيبة


كانت مباراة حلوه



تعلم تعلم من الأصفر تعلم

الخميس، 4 سبتمبر، 2008

القطوة

قبل سبوع تقريبا ابوي كان طالع مستعيل بروح الدوام

ولا يلاقي الهندي الي يغسل السيارة قاعد و يغني و يغسل


قال له يلا بسرعه و بعدين غسل السيارة الثانية


وبسرعه ابوي ركب سيارته وشوي و يحرك السيارة


ولايجوف الهندي يأشر عليه ابوي طلع من السيارة: خير شتبي؟!


ولا الهندي ماسك ابييده قطوه :بابا ذا انت دست عليه


ابوي طبعا هني فج عيونه القطوه نص جسمها انشل


دق على الدوام و قال لهم اهوه موب رايح


دخلها البيت و قعد معاها.. المشكله ان يقول ماطلعت صوت


وحتى الهندي ما سمع شي يعني ابوي بالسيارة مسكر الدرايش بس الهندي البرا هم مابيسمع


اصلن شلون ما ماتت؟؟


نص جسمها مايتحرك حتى احبالها الصوتيه اتقطعت ماتعاوي مثل القطاوه بس حلجها يتفتح


من دون صوت تقريبا نص ظهرها لريلها الي ورا مايتحرك عايشه بس على اياديها الي جدام


ابوي خذاها البيطري


ولايقول له البيطري الله يسامحه: هاذي اتكسرت انطر عليها جم يوم و بتموت مانقدر نسوي لها شي


ابوي بعد عصب و رده البيت.


( الظاهرالقطوه كانت قاعده فوق تاير السيارة ولما تحرك التايرماعرفت تنزل و ازلقت ماقدرت تقوم وابوي داس عليه)


و البيطري الله يهداه يقول كلها جم يوم و تموت


واهيه سبوع صار لها تاكل و تشرب و عايشه حياتها


اخوي الصغير مستانس معاها يحملها و يسبحها ويوكلها ومشتري لها ميميه و يعطيها تشرب حليب


ويلعب معاها بالكره وهذاك يقول جم يوم و بتموت.


احنا مسوين لها مكان حاطين لها مخده تقعد فوقها و مجابل الوحده بعد موب زين صارت بدمتنه