الثلاثاء، 17 فبراير، 2009

الله لايحرمني حبك و طيبتك


لك مني...

يدخل البيت وتكون ناطرته بأحلى ابتسامه ارتسمت على شفاتها: هلاااااا يا قلبي يابعد جبدي

يلمها و يبوس راسها تشيل الغتره و العقال من على راسه: يعطيك العافية حبيبي

يقعد ويسحبها على ريله: الله يعافيج يالغالية قولي لي شلونج انتي؟؟

ويحط يده على بطنها: وشلون بوحمود معاج عسى ماتعبج اليوم؟؟

اطالعه و تضحك: مسرع ما سميته بوحمود شدراك يمكن بنية حلوة (رغم انها تدري انه ولد)

يمد يده لخدها ويكلمها بكل حب: يه يه وانا من قدي ليااااات لي بنية اموووووورة مثلج لا ومنو امها بعد حبيبة قلبي نوااااافة

تاخذ يده من على خدها و تشبكها بيدها وكلها حيااا تحاول كثر ماتقدر ماتبين خجلها: يلا يلا خل عنك العيااارة و قوم مسوية لك خوووش طبخه قوم اسبح و صل عالنبي و تعال عشان تاكل لك لقمة

وتقوم تمشي شوي شوي بوزنها الثقيل و ايي حمود حبيبها: فديت الخطواات انا يااااعمري يااعمري

تمشي عنه ولا تعطيه ويه واهوه شغال بالغزل فيها: فديت الطول انا وفديت الويه المورد.. عاد مايندرى الحمال محليييج و لا انتي حلوة من قبل

توقف ويوقف معاها وبعصبيه مصطنعه: شلون يعني حمودو ماتروح تصلي وتيي تاكل

واهوه مثل الياهل الصغير الخايف: لاا ماما انا صليت بالدواام

وتخزه واهوه يكمل الدور وينزل لعند ريلها ويسوي روحه بصيح: صدقينــي..

تيود (تمسك) يده وتسحبه لعندها فوق وتخليه يوقف: الله لايحرمني حبك و طيبتك..

وتبوس راسه و تمسك يده و يمشون للمطبخ جنهم ماشيين مع بعض للمطار لشهر العسل..


الله يديييم المحبه يا رب




الخميس، 5 فبراير، 2009

صدفة

لك مني...


نادريركب سيارته الظهر راد البيت من الدوام بالسيارة قعد يدندن اغنيه مو ناسيكم..: وش الي جاب طاريكم و رجع لي الأمل فيكم رجعت من ثاني لجروحي بعد ما كنت ناسيكم.. حده مندمج مع الغنية

وقف لأن الأشارة حمره وقعد يلفلف براسه واهوه يغني: وانا الي لابغيت انسى و ادور غيركم مرسى

و انصدم ان البنت الي يمه بالسيد (الشارع الثاني) قاعده اطالعه و ميته علية ضحك

نادر انحرج واهيه بعد وبسرعة ابتسم له و اهوه بادلها الأبتسامه و يقول بقلبه: شرايج اتيين تقعدين وياي بعد..

وبس اشتغلت الأشارة نادر طار بالسيارة ولا درا عن الي يمه , وصل البيت تغذى ونام و قعد و راح بيقعد بالصاله مع امه و خواته , توه بينزل حس ان اكو حريم بالبيت تنحنح و غير طريجه للمطبخ

نادر: ميري منو عندنا؟

ميري:dana's friend sir

نادر: والله مادري شتقولين.. خل ابدل و اطلع ابرك

بدل نادر ملابسه وحمل عصاته و طلع بروح يلعب سنوكر وي ربعه

ركب السيارة وحط جنطة العصاة وفتح باب الطبيلة (الكراج) ولايشوف سيارة بويه نزل من السيارة و طلع برة وبعصبية: يااربي سيارة منو هاذي الحين.. والله اوادم

دق على ربعه و قال لهم يمرونه و قعد يدخن بالحوش

سمع صوت هرن و طلع وقبل ما يركب مع ربعه فش تواير السيارة الي موقفه على الطبيلة

راح و لعب و استانس و تعشى و رد البيت بالليل

نادر: قووووة يا اغلى ام و يا اغلى أخت بالدنيا

الكل: الله يقويك

الأم: وينك اليوم ما قعدت ويانه يا وليدي.. و تغمز حق بنتهاا و تكلم نادر: يوم يبناها لك ما قعدت ويانه

نادر الي فهم على امه و ضحك: اي اصلن ماابيها عندي غيرها مو دنوي.. وقعد يضحك اهوه و اخته

صوت ياي...: يلا خالتي انا استأذن

الأم: توه الناس يا بنيتي تعشي ويانا

...: عشى و الخير يا خالتي

الأم: الله وياج حبيتي مع السلامة

نادر تفاجأ من البنية: يما يما منو هاذي

الأم: توك عندك غيرها والحين منو هاذي و مشت عنه

نادر يكلم اخته دينا: صج صج دنوي منو هاذي

دينا: عجبتك

نادر: لا والله عن البياخه و قولي لي منو هاذي

دينا: ريفيجة دانة ماتشوفها رايحه توصلها للباب

نادر راح يم الباب و لا اخته دانة بويه: دندن دندونه

دانة: هههههههه يا عاشق زماانك انته عيل اليوم تغني بعواطف جياشه هههههه

نادر:ههههههههه عنبوة سيدة قالت لج.. شكو ترز ويها وتطالعني

دانة: بتضحك ابلاش وما بطالعك.. يلا يلا تصبح على خير

نادر: وانتي من اهله

وصعد نادر داره واهوه قاعد يغني

دينا: ندووور احد قال لك صوتك حلو

نادرالي كمل الغنية و ما اهتم لها: ولي ولي

وعلى السرير قعد يدندن نفس الغنيه و تذكر الموقف الي صار معاه

وقعد يضحك: والله صج انا عليي فناتق.. عاد البنت حلوة ليش ما حاولت اكلمها لا لا شكلها ما عندها هالخرابيط .... وراح بسابع نومه

اليوم الثاني عالغذا

دانة اطالع اخوها: يما تصدقين البارحة عيال الفريج الي مايستحون فششوا توايرسيارة سارة

نادر الي تبلعم وقعد يسمع و اهوه ساكت

الأم: صج مايستحون

دانة: واهيه المسكينة استحت تدخل البيت مرة ثانيةعاد قعدت تنطر بالسيارة لما اخوها يه لها

الأم: مسكيينة ماعندها سالفة جان ادخلت

نادر يقول بقلبه: انا شسالفتي وي هالبنية

الأم: نادر يما اكل دياي

نادر: اي اي باكل باكل ويبتسم

بعد الغذا نادر سحب اخته دانة: دااااانواستسمحي لي من ريفيجتيج

دانة: ليش شمسوي انته اسم الله عليك

نادر: دانوو عن السخافة عاد

دانة: انا ماني امفشلة روحي زود معاها

نادر: خلاص خلاص عطيني رقمها ادز لها مسج انا ابرك منج.. خوات عالفاضي

وبالليل نادر اخذ رقم سارة من دانة وقال بدز مسج طالع الساعه و لا توها 10 قال خل ادق عليها وصج دق نادر على سارة: الو سارة

سارة: نعم

نادر:انا اخو دانة

سارة: هلا خير دانة فيها شي

نادر: لا والله بس حبيت اعتذر عن ..

سارة: لا مسموح بس مرة ثانية دور انتقام اهون من هذا

نادر: ما كان قصدي

سارة: حصل خير مو مشكلة.. شي ثاني؟

نادر: لا مع السلامة

وسكرت سارة الخط

ونادر قعد يفكر فيها .. ياربي شكثر اهيه مأدبة ماعطتني مجال حتى على طول تبي تسكر

وين عوويش اللزقة تشوف البنات شلون يتكلمون

ويرن التلفون يرفع نادر التلفون و لا عويش داقة..: صج عمرها طويل

سد التلفون بويها و سكر جهازه: مالي خلق ملاقتها.. وبعدين لمتى انا بظل جذي عمري 25 سنة جنة لازم اتزوج و استقركل ربعي تزوجوا و الي صار عنده يهال بس انا.. لا لا انا من باجر بكلم امي تخطب لي وبهد السوالف و الخرابيط

وباليوم الثاني نادر من الصبح قعد وراح الى امه : صبج الله بالخير يمة

الأم: هلا بوليدي.. علامك اليوم قاعد مبجر

نادر: اي و الله ما ياني نوم البارحه

الأم: خير شفيك

نادر: ما فيني شي ما علينة يما قولي لي ماودج تصيرين يدة

الأم: وبكل فرحه صج تبني اخطب لك وتلم ولدها

دانة: شفيييه ندوووور

نادر: ماكو شي ماكو شي وانتي بكل شي حاشره خشمج

دانة: خلصني قول لي اعتذر حق سويرة

نادر: اي اي بس خلصنا

الأم: شفيها سارونة

نادر: يلا يلا يما احنا بنطلع

و يمسك دانة من ايدها لعند الباب: سمعيني وياني وياج اتفتحين حلجج وتقولين شي حق امي

الأم: نادر شرايك بسارة

نادر : خلاص خلاص يما بعدين

دانة: ليش شصاير

الأم: ندور يبي يتزوج حبيبي وعاد انا قلت نخطب له سارة حلوة و صغيرة و تناسبه

دانة: اي عاد سارة تناسب نادر خصوصا اهوه متعود يعني يغني و يفشش تواير

نادر: يما سكتي بنتج ترا بهون يلا مع السلامة

الأم: ماتيوزين عن طبعج انتي زين نحشتي الولد

دانة: ماعليج يما قولي تبيني اجيس نبض البنية؟؟

الأم: مالت عليج بس مالت عليج انا اكلم امها انتي طلعي منها


وبعد جم يوم ام نادر كلمت ام سارة واتفقوا يزورونهم عشان يتعرفون عليهم
وبعد شهر صارت سارة من نصيب نادر وتزوجوا و حبوا بعض
وظل نادر يغني و يش الي جاب طاريكم حق سويرة ; )

النهاية
هارد لك للقادسية
و

مبروك للعربي الفوز 2/0


الثلاثاء، 3 فبراير، 2009

LOVE U DADY


لك مني...

قبل جم يوم ابو ريفيجتي توفى الله يرحمه و يغمد روحه الجنه شفت ريفيجتي شلون اهيه كانت تبجي ومتعذبة على فراقه ابوها الغالي ..

صج الله يصبرهم و يعينهم

قعدت افكر و احمد ربي الف مره ان ابوي موجود ويانه

وكنت احاول احط روحي مكانه بس صعب عليي اتخيل الموقف

الله لا اييب ذاك اليوم ولا يحط احد فيه

وقعدت اتذكر ابوي شلون يحبنا...

لما كنت صغيرة كنت دلوعة ابوي مع ان لاني اكبر وحده ولا كنت الأصغر و لا البنت الوحيده ..

اذكر لما كان يسافر كان لازم يدق ويسألني: زنوبي شنو تبين اييب لج

وكنت كل اقول له ابي لعبة ولما يرد من السفر كالعاده كنت اروح معاهم المطار و بالسيارة ارقد

ولا اشوف ابوي و اهوه ياي

اذكر مره كان ابوي راد من دبي

و ياب لي لعبة كبيرة حتى كانت اطول مني

واذا تصفقين لها كانت تغني ( الثعلب فاد فاد..)

طبعا على ايام اول كانت شي عجييييييب

وحدي استانست عليها لانها من عند ابوي

وانا احب الوالد اكثر من الوالده يمكن عشان مخلينا على راحتنا اكثر

وطبعا اذا امي كانت تصرخ عليي ما اتأثر

بس من ابوي بيتكلم معاي و انا مسوية شي غلط حتى لو ما صرخ كنت على طول ابجي

مادري يمكن تقولون دلوعه ولا شي

بس كلام الأبو وحنانه غير ,غير عن كلام الأم وحبها و حنانها

والله يخليهم لي و يخلي لكم امهاتكم و ابواتكم

ويصبرج يا حبيبتي على فراق ابوج

الله يرحمه

.

ويعطيكم العافية