الأربعاء، 20 أغسطس 2008

ما قبل الفراق (2)

لك مني...

قبل ما يقولها بيوم
كنا مع بعض كنا احلى ثنائي عالبحر.. طول اليوم كنت معاه
كان مستانس و فرحان
تعشينة وتمشينة و عينه من عليي ماتروح
... كان وده يمسك شعري.. يحاول يتلاعب بخصلاتي
حسيت فيه
كل ما حاول يدفي يده بشعري افر راسي .. مسرع ما يرتبك و يبعد يدة عني.
سكتنا و قرب مني اكثر
حسيته محتاج لي اكثر من اي وقت
حسيته تغير بهالوقت صار زعلان و حزين
يطالع الموج و جنه يشكي..
يطالع القمر و عينه كلها الم..
حطيت يدي على جتفه.. لف راسه لي وابتسم و قال: نرجع ؟!
... قالها و ماكان وده يقولها
صوته كان فيه ترجي جنه يقول تكفين خلينه مع بعض
تكفين وقفي الزمن .. من هني انا ما ابي اتحرك
شكله كان اشبه بطفل بودع امه
ابتسمت له من كل قلبي و قربت منه حيل و لميته ..
اول مره كنا قراب هالكثر.. أول مره حسيت التعب فيه
كان دايمن اهوه الي يحمل عني و يشيل همي
...: حبيبي احنا مستانسين هني خلنه قاعدين
باسني على راسي وقال:قاعدين حبيبتي قاعدين
كل شي كنت ابيه كان مجاب.. قبل ما اتكلم كان يدري بلي بقلبي
حسيت اليوم وانا معاه عاجزه
هالأنسان الي انا احبه و اموت فيه و افداه بروحي فيه شي تعبان و خاطره متكدر
وانا ماني قادره اخفف عنه مثل ما اهوه يسوي لي...
سندني بطوله و حط يده على جتفي وقال: زينب لو آخذج و اقطج هني بالبحر شبتسوين؟
ضحكت عليه و قلت: بمسك فيك وبشبص فيك عشان اطيح وياي عشان اركب فوق ظهرك و ترفعني فوق
طالعني و ابتسم: تأكدي مو انا الي بقطج بالبحر لأني بكون بالبحر ناطرج
... يارب أحب هالريال والله, لفيت يدي حواليه وحط يده على شعري: زينب متى راح تتحجين؟؟
كنت مغمضة عيوني ومافتحته: مو احنا قلنا من ارمضان ان شاء الله
قرب راسي له و جنه يحاول يخش شعري: تلبسينه من باجر؟
فتحت عيوني و كانت الأبتسامه مو شايلتني أحس روحي اول مره ابتسم هاللون
و ما ارح ابتسم جذي مره ثانيه: باجر البسه
باسني و حسيت بقوته شوي شوي تقل: حبيبي يلا نرجع
طالعني و كله صمت وماتحجى و ابتسم ابتسامه كلها برود غيرت من لونه وقام يمشي و يمشيني معاه
وصلني لعند سيارتي و ركبت, قبل ما يصك الباب مسكت ايده و بسته سحب يده من عندي و حطاه على راسي وكان يشبه ابو يمسح على راس بنته
طلعت من السياره و كان بيني و بينه الباب: تبيني اوصلك؟
رفع حواجبة و جنه حس اني عرفت ان اهوه تعبان: ركبي السيارة يلا انا وراج بعدين البيوت يم بعض وين توصليني
نزلت راسي و ركبت السيارة و سكر الباب عليي طالعني من الجامه و اهوه مبتسم
نطرته لما يوصل عند سيارته عقبها حركت و اهوه وراي بالطريج للبيت,
الأشارة الي كان اهوه مايقدر يطوفه كنت انطر الأشاره تفتح مره ثانيه عشان نعدي الأشاره مع بعض
كان شكله تعباان و طول اليوم كان يدخن ((اهوه يدخن بس موب واايد مثل اليوم ماحبيت اسأله لأن كان يحاول يخبي عني))
وصلنا يم بيتنا و اهوه وراي وقفت السيارة في باركي و نزلت رحت عنده نزل الجامه لي: يلا ديري بالج على روحج موتركضين عالدري
....: ان شاء الله ببدل و بدق عليك
.....: خلاص انا بوقف هناك (يأشر لي بعيونه) و داخل البيت يعني اذا مادقيتي انا بدق
حطيت يدي على شعره و مشيت عنه
....: زينب
انا : نعم
اهوه: لا تنسين الشيلة باجر
ابتسمت له و بادلني الأبتسامه و مشيت داخله البيت
ركبت داري بسرعه و على طول عند الدريشه لقيته محرك و ماشي يبركن السيارة
استغربت عادة اهوه ينطرني يشوفني فتحت ليت الغرفه عقب يمشي
صكيت الستارة و رحت ابدل
دق عليي: الو
انا: يلووو قلبي
...: بدلتي؟ لا حبيبي
وسكتنا مدة
...: علامك حبيبي
...: ما علامي شي ..... آآآه
انا: تعبان
..: شوي حبي
انا: اسم الله عليك ليته فيني و لا فيك
اهوه: لاتقولين جذي انا ارقد و اصير زين
انا : يلا عيل نرقد .. باجر انا بقعدك
...: أحبج لا تنسين
انا: انا اكثر بوخشم
....: تصبحين على خير
....:و انته من اهله يالغالي

هناك 8 تعليقات:

Om MoD يقول...

انا وايد تأثر بالقصة ....صج ولا من وحي الخيال أبي أعرف ...ضاق خلقي ما احب فراق أي حبيبين ...:(

nice blog :)

جان زين لو تشيلين تأكيد الكلمة تلقينها صوب اترك تعليقك :)

Om MoD يقول...

تأثر = تأثرت

ترى حدي دايخة فيني النوم بس دشيت بلوقج وقعدت أتقرى

Om MoD يقول...

لوووووووووووول


أدري مصختها بس هذا آخر تعليق...

توني عقب ما علقت قريت في البوست اللي قبله بالتعليقات إنها قصة...بس أنا أحس إنها قصة حقيقية ..

بانتظار الرد ::)

bhr.qadsaweya يقول...

om mod
نورتي صباحي بتعليقاتج
ههههه بالنسبة للبدليه ترا عادي انا هم قريته تأثرت لولا الكومنت الثاني جان مادري انها تأثر..
بس مافهمت شنو قصدج بتأكيد الكلمه لأان ماكو شي باين عندي يم اترك تعليقك
علميني شسالفة و انا اشيلها عزيزتي
والقصة خيالية حطيت يدي على الورقة و قعدت اكتب و اكتب و وطلعت معاي القصة .. شوي و انزل آخر بارت منها
بس حبيت اقول لج انا سعيدة جدا بمرورج
او يعطيج العافية :)

Om MoD يقول...

ما شاء الله عليج القصة وايد حلوة وعجيبة ..جذي ما ودي اعرف النهاية اوواعديني أنه بيكون عندج غيرها ....بس قلبي يعورني يعني ليش سوى جذي ؟؟؟؟؟؟؟ مليق :)

وزين إنه مرت عليج عادي ...

عن تأكيد الكلمة دشي على الكومنت بدون تسجيل دخول وبتشوفينها لما يكون واحد غريب يبي يعلق يعني مو مسوي تسجيل دخول وإنشاء لله تكونين عرفتي أو قدر أوصل لج المعلومة ...

عفوا حبيبتي ولو ماكان حلو بلوقج ما جان مرينا وقرينا وعفوا وتستاهلين المرور..

ومرة ثانية أهنيج على القلم الرائع وإلى الأمام :)

bhr.qadsaweya يقول...

om mod
ربي يعطيج العافية
و يخلي لج كتاكيتج
والله انا اسعد بتواصلج حبيبتي

3bady يقول...

القصة حلوة وايد

و اكثر مكان عجبني فيها الي اهوه ينط بالبحر و يكون ناطرها

يعطيج العافية :)

bhr.qadsaweya يقول...

عبادي
شكرا هذا من ذوقك
و المقطع الي عاجبك ترا كنت بحذفه من القصه بس زين خليته p:

الله يعافيك و انت بعد يعطييييك العافية