الجمعة، 22 أغسطس 2008

ماقبل الفراق (3)

لك مني...
الفراق
يعكر صباحي صوت التلفون... (رنيت لك رنة ومارنيت لي رنة و تقول انك تحبني لا لا)..
انا:ألووو
....:زينب
وبكل استغراب: منو؟! بوهاني ؟!
أهوه: زينب انا خلاص تعبت
وقفت و بكل طيبة تختلط فيها السذاجة: شفيك اسم الله عليك يلا بوديك الطبيب
يقطعني وبكل عصبية: سممعيني يا زينب انا خلاص ما بقدر اكمل معاج
انا و ابي اخفف عصبيته: خلاص حبيبي الي تبيه بصير بس لا تزعل روحك
حسيت الرجفة و العصبية تمشي بعروقه: شفيج هبلة اقول لح خلاص بنفترق خلاص فهميني
هاللحظة انا انهزيتنزلت التلفون و حسيت روحي بردانه حسيت هوا اليونت طيحني هز قوتي
طيحني على فراشي الي صار فراش الموت من بعده
التلفون بيدي و المكالمه مستمره.. بس شقول؟؟
اطالع التلفون شقوول يا مهنا شقول؟؟
حطيت التلفون على السرير و مشيت بخطوات كلها تعب لعند المنظره قعدت اطالع روحي اطالع شكلي .. ابي افهم ... ليش؟؟
عقب اكثر من ساعه جدام المنظرة رحت على السرير
ماطاحت من عيني و لا معة الصدمة كانت اقوى من اني ابجي
انسدحت وقعدت اطالع السقف
كنت اتنفس بقوة كل ما يدخل رئتيني هوا احس روحي بطير و لما يطلع الهوا و يقارف جسمي حسيت روحي مذبوحه
اطالع السقف وويه مايفارقني
مرت الساعات و انا عالسرير أمي تيي اطل عليي اسوي روحي راقدة
اغمض عيوني و احس بحرارة تحرقني تحرق جسمي البارد كله, جسمي الي طلعت روحي منه
ريفيجتي الي اهيه اخته كانت ريفيجتي حييل
يات لي العصر و امي قالت لها اني بداري راقدة
يات لي وماحسيت فيها ماحسيت ان الباب انفتح كنت مغمضة
وما ابي اشوف شي عقبه دنيتي ظلمت ماعاد في نور بالحياة
حطت يده على جتفي و جنه اقطعت الحرارة الي كانت تحرقني
كانت اطالعني و تبجي
قمت و تكورت على نفسي و حطيت راسي بريلي وشعري غطاني
آآآه يا شعري .. تذكرت كلامه البارحه .. وينة الي يبي يخشك وينة؟؟
شكثر كان يحب شعري كان يوصيني عليه كان يقول هذا كمبلي تحملي تقصينة
رفعت راسي و عيني عالساعه كانت 4 وشي العصر
تذكرت امس كنا مع بعض كنا تونا طالعين من السينما
ريفيجتي كانت ميوده جتفي هزيتني و قطعت حبل ذكرياتي معاه: تكفين تحجي.. تكفين قولي اي شي
ابتسمت لها و دموعي بدت تنزل تنزل من غير اي صوت دموع و بس: ليش يا فاطمة؟! انا سويت شي؟؟ صدقيني ماسويت شي
لمتي و قامت تبجي من قلبها: اهوه الخسران زينب
بدت الرجفة تتعالى فيني و بديت اشهق اصيح على حلم ايامي وعلى قلبي: ما ابي شي فطوم غيره ليش اهوه يسوي جذي ليش!؟
انا ماسويت شي فطوم صدقيني
قمت مره وحده و قلت: اهوه بيي الحين
مسحت دموعي: فطوم مواعدني نطلع اليوم قال لج اهوه لا يلا قومي ببدل مابقى شي و بيي
اهيه تبجي من قلب عليي تبجي على ريفيجتها و اخوها تبجي على سعادة كانت بتنبني
ويرن التلفونها انا سيدة قلت مهنا
يلا يلا بيي ماجهزت روحي
قطعت الخط و انا كنت اقول لها فطوم موب يايه يلا قومي بمرنا
لمتني حيل و ماقدرت احرك يدي
كنت ابجي و حسيت ان قلبي ذاب ومات: خلاص انتهيت فطوم انتهيت..
اهيه: ما يستاهلج يالغالية كافي تعذبين روحج
انا: لا فطوم سأليه اكيد متضايق من شي وفيه شي انا مزعلته
كنت احط العيب فيني كنت اقول هالأنسان لا يمكن يعذبني
تلفونها رن مرة ثانيه انا فزيت قلت لها بكلمه تكفين فطوم عفيه سحبت التلفون منها و انا اشهق من البجي: مهنا انا غلطانة سامحني
اهوه و بكل تعب و جنة كان يصيح: خلاص زينب كافي .. و سكر الخط
سكر الخط و سكر حياتي معاه
تميت على هالحاله ايام لا اكل و لا اشرب امي بجت عليي ما كنت ادري بلي حواليي كنت كل اشوف ويه معاي كل شي يذكرني فيه
كنت احس فيه بيي
الي اذكره بس ان امي كانت تبجي عليي و تقرا قرآن
وشوي شوي طلعت من هالحاله وتحسنت من بعد اسابيع
واول مره كنت بطلع فيها بره البيت طالعت المنظره وشكلي كان متغير كنت هزيله ضعيفة الهالات شاحنه ويهي وتذكر اخر مره طالعت فيها المنظرة تذكرت الصدمة و تذكر شلون كان قاسي معاي
قعدت افكر على سريري اعطيه اعذار.. قطع تفكيري ريفيجتي فطوم
.....: يصير ادخل
ابتسم بتسامه برود: تفضلي
فطوم و اهيه داخله: شهالزين هذا
انا: فطوم ما ابي اطلع
اهيه و تقطعني: لا لازم تطلعين الحين لما عزمتي تطلعين و امج استانست تبين تبجينه مره ثانيه
سكت وسكت
فطوم: كافي حبيبتي تعذبتي وايد
وقطعها: خلاص فطوم يلا بنطلع
رحت عند المنظرة و مشطت شعري
تذكرت الشيله
وقلت: فطوم بتحجب
طالعتني و اهيه مستانسه: زين تسوين عأبال عندي
رحت ادور في غرفة اختي على شيلة تناسب ملابسي لقيت وحده لبسته و عدلته
رحت داري و انا مبتسمه: شاريج
فطوم: قمر ما شاء الله
.......
و جذي عشت الحياة من بعده ميته جسد بلا روح
تحجبت مثل ما يبي
وكملت دنيتي بدونه
اهتميت بجامعتني اكثر من قبل
كنت لما اشوفه يم البيت و لا بالجامعه اطالعه و تسبح في عيني الدمعه
اهوه كان يتحاشى الأماكن الي اتواجد فيها و الي يعرفني بكون موجود فيها
كان يصدني لما اطيح عيوني بعيونه الصبح كنت انزل راسي و اركب سيارتي
و اسوق بتعب و بعصبيه و بحزن
و ليومكم هذا مادري ليش تفرقنا؟!
وطن يا غربتي بدونك يا شوق و هم ذابحني
انا ادري بك تحس فيني و لام الله من لامك
the end

هناك 11 تعليقًا:

Om MoD يقول...

واي حده مليق ...ما يحس :(

bhr.qadsaweya يقول...

om mod
ههههه مسكين يمكن الريال فيه شي
ومايبي يشنطط البنت معاه
عالعموم اهيه مجرد شخصية
و مشكورة على تواصلج

Smarties يقول...

الفراق صعب =(
حالياً عايش حالة فراق، بس مو حب ورومانسية P:
صديق عزيز علّي وثاني اقرب شخص لي، وللأسف يمكن هذة اخر مرة اكلمة فيها!!

والله عندج خيال قدساوية، جربي تكتبين قصص اطول، يمكن يصيرون مسلسلات برمضان بعدين D;

bhr.qadsaweya يقول...

smarties
ميخالف شتسوي هاذي الدنيا
يوم تلاقي روحك مع شخص حييل و اليوم الثاني تلاقي وخر عنك
بس صدقني كل شي يصير بهالدنيا خير للناس
عسى ان تكرهوا شي وهو خيرا لكم..
.
. شدراك يمكن انافس فجر السعيد و وداد الكواري << حدي مصدقه
تسلم على مرورك الدايم و تواصلك
او يعطيك العافية

3bady يقول...

انا اقول يبي مصلحتها فجذي هداها .. بس لو شارح لها الوضع ليش هداها.. مو جذي يخليها حرام :(

MO3ATH يقول...

عفية عليه الي يقدر يكمل حياته بعد ماذبحها جذي ، في ناس قلوبها ميته لهالدرجة ؟

وضعها يكسر الخاطر والله انا حدي اندمجت :)

bhr.qadsaweya يقول...

عبادي
كلامك صح
الواحد لازم يقدم سبب قبل ما يقدم على شب بسويه
وخصوصا بالفراق
تشكر على المرور
او يعطيك العافية


.


معاذ
عجبني تعليقك وايد
يعطيك العافية و مشكور على مرورك

Pearl يقول...

تدرين وايد اندمجت بالقصة و الشخصيات :( .. لاني شايفتها بالواقع
الفراق الي من غير سبب يذبح ..

بس أهدى بطلت القصة هالمقولة :
" لا تقضى الوقت مع شخص لا يهتم بقضائه معك "

fatto يقول...

واااي .. شنو هالقصه الي تبجي .. والله عورتي قلبي ..

ودي اعرف شنو سبب فراقه لها :(

gawga3a يقول...

((انا احب جذي البنيه الي تهتم بريلها )) هذا مقطع من بوست (ليله الاحد ) انا مافمت !! اهم متزوجين ويلا لأ ؟؟ لأن في ( الفراق ) انا فهمت لأ !!

bhr.qadsaweya يقول...

اول شي سوري و pearl و gawga3a و fatto
ترا صج توني اشوف تعليقاتكم

فاتوو
السبب مجازي
انتي بروحج عطيه عذر ليش اهوه سوه هاللون
او يعطييج العافية

بيرل
اهيه القصة حزينة و تخلي الواحد يندمج
مشكور على مرورج حبيبتي
و يعطيج العافية


قوقعه
(ليلة الأحد) كل مره لازم تهتم بريها وتداريه بطلباته و بمعاملتها له
(الفراق) لا اهمه مو متزوجين
يعطييييييج العافية حبيبتي