الأحد، 26 يوليو 2009

علي ودانة3

لك مني...
بعد شهر تقريبا من الشوق و الوله الي سكنوا قلب دانة لعلي, وعلي الي كان يتبع كل خطوات دانة ويعرف برنامجها وين تروح ووين تيي ..كله عشان يسرق شوفتها ويكون متخبي ومتأكد بأن ماكو احد بقلبها ..
دانة تقرر تنزع حب علي من قلبها : ياربي مر بحياتي طيف و اختفى
تتمشى في غرفتها و توصل للدريشه اطالع السما و تناجي ربها: دخيلك ياربي اعمي قلبي عن حبه ..
وتنزل عيونها على واحد مار يم بيتهم : منوووو علي .. شفيني قمت اخورة انا لازم اشيل هالأنسان من بالي وتفكيري.. لازم اغير جو وطلع بره الديره جم يوم
وتروح عند امها تخبرها بقرارها
__
علي الي صج اهوه كان مار يم بيت دانة: بودعج انا اليوم فراق بشوق بلقاج.. آآآآه خلاص يا حبيبة قلبي كلها جم شهر و ان شاء الله بتكونين من نصيبي
و بعد يومين
علي يقعد الصبح يزهب جنطته عشان دورة مدة شهر
ييروح عند يدته بكلمها بموضوع: صبحج الله بالخير يالغالية ويبوس راس يدته و يقعد يمها
اليدة: يصبحك بالنور و السرور ياوليدي .. ها زهبت ملابسك
علي : اي يمه.. يمه
اليدة : آمر حبيبي
علي و بحييرة وتردد: ...
اليدة: علامك شفيك
علي: يمه انا ..
اليدة: اي شفيك
علي: انتي تدرين انج بحسبة امي الله يرحمها..
اليدة : الله يرحمها بس شلزوم هالحجي الحين؟
علي وبوهقة: يمه انا شفت بنية و عجبتني وودي لو تصير من نصيبي ان شاء الله
اليدة و بكل فرح: هاذي الساعة المباركة ياوليدي اتعرفها انت و تعرف اهلها
علي: اهيه من عايلة معروفة و الحمد الله دين وادب واخلاق .. بس انا خايف.. متردد يعني
اليدة: ههههه خايف و متردد لو مستحي
علي يبتسم حق يدته
اليدة: بعد الدورة يا وليدي اكلم اهلها وبعيوني اروح اخطبها لك والله فرحتني يا حبيبي
علي وبعفوية: ليييييييش بعد الدورة
اليدة: وييييييييه وييييييه وين الي توه متردد و خايف... بعد الدورة يروح منك الخوف و التردد يا متردد انته ,وتقرب منه و تغير صوتها علي مو انت متردد
يضحك علي على كلام يدته و توعده بعد الدورة تكلم اهل البنت و ان شاء الله خير
عالظهر كان موعد طيارة علي يروح يسلم على يدته و يبوس راسها و ايدها
اليدة : الله يحفظك يا حبيبي و يسر لك امورك.. لو المرحومة موجوده جان ما وسعتها فرحتها اليوم..
ويطلع علي من البيت على دعوات يدته له متجه مع ربعه للمطار فرحان ومطمن قلبه
__
دانة تطلع من الداوم و تروح المطار بتشوف الحجوزات وتحجز عشان تسافر , توصل المطار و تنزل تروح حق الأستعلامات و تسوي كل شغلها تخلص وبعد التعب و تقرر انها تتغذى بالمطار وترد البيت
علي الي باقي على موعد طيارته ساعة و شي قعد يتفرفر بالمطار ويدخل المحلات ودانة المسكينة الي كانت تاكل بكل شراهه جنه مو مصدقة جدامها أكل ...
وهني اطيح عيونهم بعيون بعض علي ودانة بالمطار
دانة المسكينة الي غصت باللقمة و علي الي يه لها مومصدق ان شافها قبل ما يسافر
علي: شلونج
دانة تيود العصير: حمد الله .. تفضل تفضل
علي : صحة
دانة تبتسم : الا هني ؟؟
علي: اي و الله عندي دورة بره الديررة
دانة: تروح و ترجع بالسلامة
علي: يطالع التذكرة بالجنطة الله يسلمج.. وانتي.. شكلج بروحج ؟؟
دانة: ماكو بروح دبي .. تغيير جو يعني
علي مصدوم: صج انا دورتي بدبي
دانة تبتسم: عيل ما بفتك منك
علي يضحك: ههههه اي كلش ماكو فكه.. قوليلي مضبطه امورج هناك
دانة: لا بس ريفيجاتي هناك اهمه
علي: مايحتاج انا موجود انتي بس قولي لي متى توصلين و من اول ما تنزلين من الطيارة انا استقبلج
دانة: لالا ماكو داعي
يقطعها علي: شفيج احنه اهل ديرة وحده و انتي محسوبة عليي بالغربة.. بدبي
دانةالي ماتدري شتقول من كلام علي: لا انا متعودة اروح بروحي
علي هم يقطعها: خلاص قلت لج متى توصلين
دانة زي الهبلة: باجر 7 المغرب
علي: خلاص ادق عليج انا لما اوصل اليومو اخبرج بكل شي اذا ماعليج امر عطيني رقمج
يمسك التلفون و يتصل على رقمه (الي يقول ماعنده الرقم و كاتب عليه دانة قلبي بعد).. يلا كملي اكلج انا اخليج الحين اشوفج باجر على خير ويروح عنها..
دانة المفهيه: ..على خير ...وتكلم نفسها: في شي ما قلت لك اياه بعد صج اني مينونة ضروري اقول له بدبي.. وانا شدرني بعد دورته بدبي.. والله حاله ياربي قلت لك اعمي قلبي عنه مو تجمعني معاه بنفس المكان
يتبع

هناك 20 تعليقًا:

Fishah يقول...

هالعلي ماكو فكه منه .. شكله نصيبها صج بكل مكان طالع لها :)

بشوف شصار في دبي .. مادري ليش احس ان السالفه بيصير فيها صدمه :P

يالله يالله حدج يومين ونبي التكمله لو سمحتي :> مو تطولييييييييييين :>

رورو الشخبوطه يقول...

اهي اهي ..

انا ابي بعد خخخ..

تهقين فشه صدمه!!

اي بليز نبي التكمله ..

ومرسي ع الجزء..

bhr.qadsaweya يقول...

fishah و رورو

يقولون صدفة خير من الف ميعاد

هه انتوا توقعوا و انا بشوف التوقع الي يعجبني و بخلي عليه القصة .. شرايكم

عيوني لكم بس خل يكمل البارت الياي
وانزله على طول

يعطيكم العافية

اقصوصه يقول...

مشوقه جدا

بانتظار البقيه:)

Fishah يقول...

رورو

اي احس انه بتصير صددددددمه :)


قدساويه

لاااااااااا لاتغيرين شي .. نبي على طريقتج بليز :)


لوووول انا قاعده ارد اهني ماخذه راحتي .. اموون امووون :**

bhr.qadsaweya يقول...

اقصوصة
منورة حبيبتي
D= مشكورة
يعطيج العافية

Fishah

هههههه خلاص على طريقتي تامرين انتي بس خل اعرف كل وحده شنو تتوقع .. العب بأعصابكم p;

اييييي افااااااا عليج البلوق بلوقج
تامرين عليه

يعطيج العافية حبيبتي

غير معرف يقول...

القصة وايد حلوة

انه اقول بطيح الطيارة

وبتموت دانة

لي عودة بانتظار البقية

دمتي..

bhr.qadsaweya يقول...

غير معرف

حرااااااام لا لا ما بموت احد منهم

D=
دامت ايامك و يعطيك العافية

bhr.qadsaweya يقول...

nono

تسلمين و الله

اسعدني مرورج و منورة

يعطيج العافية :)

bokeh of magic * يقول...

واايد حلوه القصه D:
ناطريين التكمله شوقتيييينا

ميمة السبيت يقول...

** صباح الورد ..

القصة حدها وناسه بس يحليلها عزايم و كافيه هذا وهي ماتعرفه قاعده بفيقاس دانه يحليلها ..

يالله لايوقف خووش قصة الله يعطييج العافية

bhr.qadsaweya يقول...

being one

انتي الأحلى حبيبتي
ان شاء الله جريب يعطيج العافية
___

ميمة السبيت

صبح النور و النوير حبيبتي
هههههه اي عايشة الوضع

يعافيج يالغالية
وانتي هم يعطيج الف عافية

bhr.qadsaweya يقول...

ميمة السبيت

صباااااح**

كبرياء وردة يقول...

تراني متابعتها من زمان:p

لا توقفين

bhr.qadsaweya يقول...

كبرياء وردة

يـــــــــالقااااااااطعة ;)

شلونج عشاج بخير

ان شاء الله حبيبتي
يعطيج العافية

fatto يقول...

ياكثر ماتصادفو عل وعسى اتكون من نصيبه .. الله يخليج بحرينيتنه مانبي فراق وموت وبجي واحزان .. ابي نهايه سعيده لوووول

twinkle يقول...

بانتظار البقيه :)

قانونى كويتي يقول...

يعطيج العافية

تحياتى لج

وبانتظار القادم لج

شاي الضحى يقول...

كملي كملي شوقتينا

مشكوووووره ؛)))))

bhr.qadsaweya يقول...

فاتوو

ههههه ان شاء الله حبيبتي :)
يعطيج العافية

___

twinkle

ان شاء الله :)
يعطيج العافية

__

قانوني كويتي

الله يعافيك و يحييك يارب
ان شاء الله
منور و وردتك اسعدتي وايد
يعطيك العافية

__
شاي الضحى

حبيبتي بكمل انشاء الله بس عطيني يومين

هههههه العفو بس على شنو حبيبتي

يعطيج العافية