الخميس، 30 يوليو 2009

علي ودانة 4

لك مني...

ترجع دانة البيت و موب عارفة شتسوي تسافر ولا لاء
حطت راسها عالمخدة تحاول ترقد بس هيهااات التفكير ذابحها.. شنو بصير هناك.. اروح بيت ريفيجاتي ولا اقعد بالفندق: بس خلاص ماابي افكر بروح والي فيها فيها
ويرن تلفونها اطالع الرقم غريب : مالي خلق ارد
تسوي تلفونها سايلنت و ترقد
____

علي الي وصل دبي و وصل الفندق وكان معاه مجموعة من زملائة بالدوام كل واحد فيهم راح غرفته واهوه المسكين قعد يتصل على دانة على اساس اذا تبي تحجز معاه بجراند حياة ولا تبي بفندق ثاني بس ما كانت ترد و قال بروح اريح و يتغذى..

اخذ له شور سريع ونزل بروح ياكل له شي
راح وطلب له من اندياموو وعلى ما يجهز الأكل كان يحاول يكلم دانة بس ما كانت ترد عليه: اكيد ناسية تلفونها بمكان هالبنية تنسى روحها عادي ماكومشكله..
فر راسه ولا يشوف واحد من ربعه الي مو شايفه من زمان وقام و سلم عليه: هلااا بو يوسف
بو يوسف: هلاااا علووي شلونك شخبارك
علي: بخير انت شمسوي وينك ماتبين اول مطيح عندنا ومرة وحده اختفيت
بويوسف: بعد شنسوي مشاغل الدنيا بس حلات هالصدفة الي خلتنا نشوفك هني
علي : شفت شلون عاد بالديره مانلاقي بعض وبهني انتصادف
بويوسف: اي والله انا استأذن الحين بس اشوفك مره ثانية ان شاء الله خو انت نازل هني
علي: ان شاء الله.. على خير
ويروح بويوسف مع ولده و مرته الي كانوا ينطرونه, علي كان يطالع ريفيجه و تمنى لو انه يكون مكانه و معاه دانة ..
وصل الأكل و علي تغذى وخلص, قعد يتمشى بالفندق شوي لحد ما تعب كلش وماقدر يقاوم اكثر راح غرفته و رقد من زود التعب
__

عالمغرب جذي دانة قعدت من النوم تسنعت وتعدلت و طلعت مع ريفيجتها تعشوا وتمشوا وشرت لها جم شغله كانت اهيه تبيهم وردت بالليل قعدن تفكر: علي قال بيتصل وما اتصل.. تذكررت الرقم الغريب الي دق عليها قبل ماترقد على طول قالت يمكن علي طالعت المكالمات و الرقم الي دق عليه قبل مايسافر وطلع اهوه وقالت بتصل فيه: يرن مدة طويلة .....الو
علي الي قعد من النوم ورد: ياهلا... نعم
دانة: حمد الله على السلامة
علي الي استوعب انها دانة: هلا هلا الله يسلمج
دانة: خير انت متصل علي الظهر
علي: اي و الله كنت بسألج عن الفندق اذا تبين بجراند حياة ولا بفندق ثاني
دانة: اممم انا متعودة انزل بفندق ثاني بس مو مشكله انجرب بجراند هالمره
عليي: خلاص بعد شوي احجز لج متى توصلين انتي
دانة: الساعه 7 يعني 8 عندكم جذي
علي : خلاص انا بكون بنتظارج
دانة: ماله داعي انت بتكون مشغول
علي: لا لا ماعليج ... يرن تلفون الغرفة
علي: دانة انا اخليج الحين باجر الصبح اتصل فيج ان شاء الله
دانة: اوكي باي


تسكرالتلفون وتقوم ادور جنطتها وعلي الي عصب لان طلعوا داقين على رقم الغرفة بالغلط: يلا بعد مره وحده اقوم احجزحق البنية

وتسبح و تعطر و نزل يحجز لدانة وهني توهق مايدري يحجز لها جناح و لا غرفة قرر يحجز جناح صغير حجز و خلص و دز لها مسج : امورج كلها جاهزة بس بقى عليج تشيل جنطتج و تيين :)

دانة الي حتى جنطتها مولايقيتها وتعكر مزاجها بس استانست على مسج علي وردت عليه: شكلي بهون جنطتي الي احبها مو لايقتيها مادري بشنو بحط غراضي

علي ضحك من قلب على مسج دانة وراح غرفته بكمل نومته


اليوم الثاني دانة قعدت الصبح تفطرت مع اهلها و راحت السوق تدور لها جنطة صغيرة توسع اغراضها لقت بسرعة وردت البيت ولما كانت بالطريج علي دز لها مسج: صباح الخير.. بشري لقيتي جنطتج

وصلت دانة للبيت و ردت عليه: صباح النورو السرور اي الحمد الله لقيت يعني بشرف اليوم دبي..

علي الي توه كان بدخل المؤتمر رد عليها: اشوفج


قعدت دانة اتعدل اغراضها وترتبهم خلصت وتأكدت من كل شي سكرت الجنطة و قضت باجي اليوم مع اهلها

عالساعه 5 تقريبا راحت المطار كانت تتحاتي شوي شبصير هناك وخصوصا ان علي ما دق عليها وماحبت اهيه ادق عليه قعدت تتمشى وشوي ودق علي عليها ضحكت و ردت : هلا

علي: يلااا متى بتيين

دانة: بالطريج أقصد بالسما

علي : ههههه يلا ناطرج بالمطار موتضيعين

دانة: لا لا ادل يلا انا لازم ارروح

علي: فمان الله

كملت دانة طريجها و ركبت الطيارة من اول ما ركبت مسكت كتاب بيدها وقعدت تقرا لحد ما هبطت الطيارة ونزلت بس كان فيها شوية خوف خصوصا ان محد من ريفيجاتها يدري ان اهيه بتيي..
خلصت شغلها و شالت جنطتها و طلعت تمشي و خطواتها كلها ثقل و ارتباك و خوف و مره وحده علي يطلع بويها ياخذ جنطتها منها و يسحبها: حمد الله على السلامة.. نورت دبي و الله
دانة مع ابتسامة خجل: الله يسلمك
علي يمشي بسرعة و دانة كانت تمشي وراه ويلتفت لها: نتعشى و نروح الفندق شقلتي
دانة: لالا سيدة نروح الفندق احسن
علي: على راحتج
ويروحون الفندق وطول الطريج اهيه ساكته و اهوه يتكلم و مرتاح عالآخر يحس بخجلها و خوفها لكن كان مستانس على هالشي , وصلوا الفندق و علي وصل دانة للسويت الي حجزاه لها و تشكرته وايد على الي سواها وياها ودخلت السويت وعلي راح غرفته بس كان يغلي يبي يشوفها ما كفته هالدقيقتين يبي يكحل عيونه فيها ودق على دانة: الو
دانة: يا هلا
علي: عندش نص ساعه و تنزلين شلون نبي نتعشى
دانة: بس..
يقطها علي: من دون اعذار يلا ناطرج
دانة: ان شاء الله
تسبحت ووتعطرت و بدلت: اشوه يبت لي بدلات سنعة هقيت بقضيها كل بجامات نوم
ونزلت لعلي المسكين الي كانت عيونه طايره حوالي البنت الي طلعت من اللفت دانة كانت ادورة لكن بسرعه لقتها لان كان واقف مسطول جدامها وراحت له: والله اني تعبانة لكن ما حبيت اردك .. يلا
علي: .. يلا
دانة شوي خافت من عيون علي الي كانت اطالعها و بقلبها كانت تقول الله يستر, راحوا و قعدوا بمطعم هادي ستايله نيويوركي طلبوا و قعدوا يسولفون: تذكرين لما عزمتيي على الريوق
دانة: اي و قتنها كنت نحيس معاي واايد
علي وبنظرة حادة: لأنج بطيتي جبدي .. يزات الخير .. تلفونج ونظارتج
دانة: بل بل اجرك على الله
علي: يبا مانبي منج شي انتغشمر ههههه
دانة: انت شلون تعرفني و تعرف اسمي
علي الي تبلعم: يعني
دانة الي بدت تستجوبه: اي يعني شنو.. توهق البطل
علي: هههه لالا انت شتبين تعرفين الحين
دانة: اسمي انت ناديتني بسمي
علي: ... يعني انتي كلش ماتذكرين منو انا
دانة: لا و الله منو انت
علي: افااااااا هذا الي انا الحين اقول عارفتني اخرتها اطلع ولا شي.. يلا يلا كاوصلت الشوربه خل ناكل
وقعدوا ياكلون طبعا على الي وهق دانه و خلاها تفكر منو اهوه و لكن في الأساس اهيه ماتعرفه و لا شي
بعد الأكل كل واحد راح غرفته وكل واحد شاغل باله بالثاني
دانة الي تغسل و اطالع وويها بالمنظره: منو هذا ياربي شكله يعرفني حيل
علي المنسدح عالسرير: ياربي ياربي شلون افاتحها بالموضوع و شلون ببرر جذبتي
ويغط كل واحد فيهم في سبات عمييق
اليوم الثاني عالساعه 9 ونص دانة تقعد من النوم تاخذ شور ادق على اهلها و اطمنهم عليها و طبعا حصلت زفه محترمه عشان كانوا يدقون عليها و اهيه راقده ماتدري عن روحها بعد ما خلصت من التلفون طلبت ريوق للغرفة قعدت تاكل و تاكل .. لأن اهيه من النوع الي تودي بالأكل لكن ما يبان عليها وبالعشى مع علي ما كلت براحتها
خلصت و قالت بتقعد تقرا بالكتب الي يايبتهم معاها. .قرت ساعه وحده تقريبا وملت : ياربي انا يايه احبس روحي هني و قالت بتطلع بتتفرفر بره شوي, بدلت و وخلصت و نزلت باللوبي كان وايد زحمه و كان في ناس تصرخ وكان بينهم علي ماحبت ادخل روحها سلمت الكارد وطلعت..
علي لمحها و اهيه طالعه بس ماقدر يلحق وراها عشان كان وايد مشغول صارت معاهم شغله بالمؤتمر و تهاوشوا و قالوا بردون الديره , علي كان يحاول يهدي الوضع كانت الوحيده الي شاغله باله دانة شلون اهوه يخليها بروحها هني و يرد الديره ..
يتبع


هناك 14 تعليقًا:

غير معرف يقول...

تسلم اناملج
بغينا نعرف شالنهايه بس ما ودنا تخلص القصة و الله

دمتي

*Being One يقول...

ﻳﺎﻟﻠﻪ ﻛﻞ ﺷﻮي ﺗﺸﻮﻗﻴﻨﺎ اﻛﺜﺮ و اﻛﺜﺮ
ﻻ ﺗﻄﻮﻟﻴﻦ ﻋﻠﻴﻨﺎ :)

bhr.qadsaweya يقول...

غير معرف

الله يسلمج :)
دام عزج و نبض قلبج حبيبتي

يعطيج العافية

____


being one

هههه ميخالف البارت الياي
اخر شي ان شاء الله << اول مره اصرح حصريا مع being one =)

يعطيج العافية يالغاليه

اقصوصه يقول...

حلوه وايد :)

رورو الشخبوطه يقول...

السلام..

نبي نهايه سعيده بليز..

بنشبع نكد برمضان خخ..

خوش بارت ماشاءالله..

متابعينج@@

ومشكوره..

fatto يقول...

لعبتي بعصابي صح ..

الجزء الرابع راح تكتبين اشلون يعرفها .. ترى هذا امر لووووووووول


تسلمين عل القصه الروعه :)

fatto يقول...

اقصد الخامس :) منكثر ما انا ابي اعرف اشلون يعرفها تخربطت لوول

bhr.qadsaweya يقول...

اقصوصة

انتي الأحلى حبيبتي

يعطيج العافية

___

رورو
حبيبتي عيوني لج يالغاليه

العفو..

يعطيج العافية

___

فاتووو

افاااااااااااااا عليج
تامرين امر انتي :)

يعطيج العافية

Fishah يقول...

قمت اكره كلمة يتبع :(

بعرف شساااالفة هالعلي :<

ناااطرييييين :*

شاي الضحى يقول...

يالله ناااااااااااطرين وين البااااااااااااااااااااااااااااااجي؟

أحمد الحيدر يقول...

متابعين ..

bhr.qadsaweya يقول...

Fishah

افا عليج البوست الياي اغيرها
بدل تبع النهايه ..
شرايج؟؟

يعطيج العافيه
___

شاي الضحى

الوعد في البوست الياي :)

يعطيج العافيه


___

أحمد الحيدر

=) نورت بهالزيارة

يعطيك العافيه

غير معرف يقول...

teslamen
we are waiting last part

.
shahad

bhr.qadsaweya يقول...

shahad
alla yesalmech 7abebty
inshalla jreeb
D= thanx 3la elzeyara