الخميس، 4 سبتمبر 2008

القطوة

قبل سبوع تقريبا ابوي كان طالع مستعيل بروح الدوام

ولا يلاقي الهندي الي يغسل السيارة قاعد و يغني و يغسل


قال له يلا بسرعه و بعدين غسل السيارة الثانية


وبسرعه ابوي ركب سيارته وشوي و يحرك السيارة


ولايجوف الهندي يأشر عليه ابوي طلع من السيارة: خير شتبي؟!


ولا الهندي ماسك ابييده قطوه :بابا ذا انت دست عليه


ابوي طبعا هني فج عيونه القطوه نص جسمها انشل


دق على الدوام و قال لهم اهوه موب رايح


دخلها البيت و قعد معاها.. المشكله ان يقول ماطلعت صوت


وحتى الهندي ما سمع شي يعني ابوي بالسيارة مسكر الدرايش بس الهندي البرا هم مابيسمع


اصلن شلون ما ماتت؟؟


نص جسمها مايتحرك حتى احبالها الصوتيه اتقطعت ماتعاوي مثل القطاوه بس حلجها يتفتح


من دون صوت تقريبا نص ظهرها لريلها الي ورا مايتحرك عايشه بس على اياديها الي جدام


ابوي خذاها البيطري


ولايقول له البيطري الله يسامحه: هاذي اتكسرت انطر عليها جم يوم و بتموت مانقدر نسوي لها شي


ابوي بعد عصب و رده البيت.


( الظاهرالقطوه كانت قاعده فوق تاير السيارة ولما تحرك التايرماعرفت تنزل و ازلقت ماقدرت تقوم وابوي داس عليه)


و البيطري الله يهداه يقول كلها جم يوم و تموت


واهيه سبوع صار لها تاكل و تشرب و عايشه حياتها


اخوي الصغير مستانس معاها يحملها و يسبحها ويوكلها ومشتري لها ميميه و يعطيها تشرب حليب


ويلعب معاها بالكره وهذاك يقول جم يوم و بتموت.


احنا مسوين لها مكان حاطين لها مخده تقعد فوقها و مجابل الوحده بعد موب زين صارت بدمتنه









هناك 15 تعليقًا:

Smart-y يقول...

وعليييييييا عليها هالقطوه!
مسكينه =( شكلها جيكره P:

ديروا بالكم منها، لا يكون فيها مرض او شي. ويحليله ابوج والله قلبه رؤوف بالحيوانات :) الله يخليه لكم ان شاء الله.

عاد الحين تقدر تحرك ريولها ولا لأ؟

bhr.qadsaweya يقول...

smarties
هههههه اخاف اقول جيكره تطلع فيها يني و تبلشني فيها<< لااالاااا اصلن اهيه حلوة منو يقول جيكره :)

والله تعور القلب ترفع روحها بأياديها و تزحف :(
يعطيك العافية

gawga3a يقول...

احلى مافي الموضوع ( اخوج ) الله يخلي لكم انشاءالله :)

وماتشوف شر القطوه :)

خطاكم السو

Om MoD يقول...

حبيبتي هالقطيوة الله كاتب لها عمر ولا شلون .؟؟؟؟ سبحان الله

الله ياجركم فيها إنشاء الله ..وإنشاء الله تتحسن ..كسرت خاطري والله

بس شكلها بالصورة صحها زينة؟؟؟؟؟

وشلون تسبحونها ؟؟؟مو مجروحة ؟؟؟يعني ما تدمي ؟؟؟؟الله يعينكم :)

bhr.qadsaweya يقول...

gawga3a
تسلمين و الله يخلي لج كل غالي على قلبج
الشر ما اييج حبيبتي
يعطيج العافية:)
.
.
.
om mod
والله شقول لج صج سبحان الله
مافيها شي عادي عايشه حياتها
ولا دم و لا شي
ولاجرح اصلن صار فيها
صج سبحان الله
يعطيج العافية يالغالية

3bady يقول...

احنا مني تلقين القطاوة مسدحة على رصيف الشوارع من كثر ما اندوسهم بالسيارات

و نتمنى لهم الهلاك من الفريج ذبحونا يشققون جياسة الزبالة و انتي بكرامة و يطيح الوسخ

اخوي كل يوم قبل لا يشغل السيارة يطق عليها علشان يتاكد مافي قطوة تحتها

الشي الوحيد المفيد الي يسوونه يقضون على الفيران :P

bhr.qadsaweya يقول...

3bady
ههههههه
حرااااام بعدين بصير عندكم نقص بالقطاوه
عاد تصدق ماتت اليوم القطوة
الله يرحمها برحمته
كلنا طلعنا من البيت وماردينه الا و اهيه ميته بتوحشنا :'(
يعطيك العافية

غريب يقول...

الله يعين مسكينه القطوه بس زين سويتوا كله بجره

Om MoD يقول...

مسكينة ....ماتت لا حول ولا قوة إلا بالله ..بس كان شكلها صج ما فيها شي وكنتوا مهتمين فيها..

بس اخاف يوم طلعتوا عبالها خلاص بتعيش بروحها جان تموم من الحرة :)

بانوراما يقول...

ههههههههه

عظم الله أجرج قدساوية

الي يسمع الحيين كل هالتعازي ملك دولة ماات ولا واحد كبيير

_____________________

3bady

عندنا وعندكم خير

قطعتنا

وفريجنا بالذات مرتع القطاوة

بس افتح زبالة وانت بكرامة يطلعون لك 70 قطوة ورا بعض

الي يسمع داخلين معكسر مو زبالة ( عز الله السامع)

bhr.qadsaweya يقول...

غريب
احنا سوينه الي علينه
بس الله ما كتب له عمر
تشكر عالمرور
.
.
.
om mod
ههههههه
لا مو جذي السالفه لما كنا حاطينه عالمخده كانوا ايون لها نمل يعضضونها فكانت تتحرك بسرعه و تلفلف راسها نروح نطل و لا نمل
فأبوي سوه لها دورفة هذول ملوت السقف مال اليهال الي مثل السرير يحطون الياهل فيه وينهز
احنا وكلناه و طلعنا يينه و لا المسكينه كانت تبي تنزل اياديها تحت وراسها بس حز الدورفة صار على رقبتها ماعرفت ترتفع و لا تنزل و الجزء الي ورا ماتقدر تحركه و ماتت ظلت مسكينه لين ما يبست وسلمت روحها
(ماتت موته شنيعة)
.
.
.
الموالي
اجرنا و اجرك
تصدق مكن لو ملك دولة و لا واحد كبير يمكن مابتصير هالتعازي ولا بكتب بوست عنه لكن احس هالقطوة تعذبت
ضحكت لما قلت 70 قطو بالزباله الي يسمع دورة معسكر << لوووووول
الظاهر عندكم دورات مغاوير قططيه
تسلم عالمرور :)
.
.
.
يعطيييييكم العافية كلكم غريب => و ام مود =] و الموالي :)

joe يقول...

هههه احنا نبي الفكه من القطاوه الفريج متروس قطاوه و لو نشوف قطوه معوقه او مريضه نخليها تولي بس صج ابوج يحب الحيوانات رؤوف عليهم على قولت سمارتز

bhr.qadsaweya يقول...

kuwait master
حراااااام يبيلة نشتكي عليكم عند حماية الحيوانات
احنا قليل تشوفين قطاوة بالفريج يعني يمكن 3 4 هاللون مو اكثر
ومأدبين تكرم ما يشققون جياس الزباله حتى
يعطييييك العافية

Om MoD يقول...

مسكينه كسرت خاطري أكثر ..تتوقعين مسوية شيوأمها مو راضية عليه هالمسكينه ...تعذبت ..الله يرحمها ..كلش يعني مو مترقعة يعني حتى لما طاحت بيد ناس سنعة مثلكم الله ما كتب لها تعيش سبحانه :)

bhr.qadsaweya يقول...

om mod
يومها هذا
ولله رحمها ابموتتها
لأن يمكن كانت اهيه تتألم
واحنا مو داريين
:) يعطيك العافية حبيبتي